My tumblr mug

اهلا :) 

من زمان كنت ادور مق ينفتح وتحطين فيه الصوره الي تبين (تمبلر مق) وقالو لي فيه بستار بكس 

رحت ستار بكس الراشد والظهران وابن خلدون وكل مكان بس مخلصينه الناس 

ومن الحظ ايكيا توهم منزلينهم 

وركض على ايكيا اشتريه سعره ٢٩ ريال بس 

الفرق بينه وبين حق ستار بكس ان ستار بكس فتحته من فوق اسهل اما حق ايكيا صعب فتحته بس حق ايكيا يحفظ البروده والحراره مده اطول ف لا تاخذون حق ستار بكس الا اذا انتو من الناس الي يجغمون القهوه ب ثواني :( 

هذا هو

اول شي ادخلو تمبلر او طلعو اي صوره من النت واطبعوها بالعرض مو بالطول اكرر بالعرض 

بعدين افتحو الغطا الاسود الي تحت وطلعو الورقه شوي شوي انتبهو لا تشقونه

الاشياء الي تحتاجونها : 

-مقص 

-الصوره الي تبينها

-قلم رصاص 

بس 

بعدين خذي الورقه الي فوق حطيها على الي تحت 

ثبتوه عدل وشراح تبين الطبعه الي تحت خلوها بالنص

بعدين ابدي حددي على اطراف الورقه كلها 

اذا خلصتي بيطلع كذا مضبوط لانك حاطته من الاول بالنص 

قصيها ولفيها زي كذا واقلبي الكاس عشان تدخلينها 

النتيجه جميله<3!! 

طبعا سويت اكثر من واحد ومتحسفه اني صورتهم وما راح انزلهم سو .. 

هذا الثاني 

هذا الثالث

استمتعت وانا اسويهم .. 

اهم شي لما تخلصين اجمعي الورقه الاصليه الي طلعتيها من المق والباقي من الصور وحطيهم بملف شفاف منعا للوصخ

يا رب ما فيه اخطاء املائيه واشوفكم على خير :) 

تنظيف اسفنجة البودرة المضغوطة

اهلًا :) 

من زمان اشوف الإسفنجة حقت البودرة المضغوطة لونها يشكي!! 

وكل يوم اقول بكرا انظفها.. ويجي اليوم الي شديت ألهمه وقلت اسوي خير وانظفها

هذي صورتها

 

و دورت عن طريقه انظفها ودورت ودورت وساعدتني وحده قالت لي انظفها بشامبو جونسون

ما استغربت أبد يوم قالت لي كذا ان جونسون تركيبته خفيفه ومستحيل يأثر على البشره

تحسبا للي ما يعرفون وشهو جونسون 

لا تستغربون ترا مرا صادفت وحده ما تعرفه :) 

هذا هو ... 

حطي شوي على الإسفنجة وباصبعك الإبهام بحركه دائرية افركيه

وحطي شوي مويا وافركي وبتلاحظين الوصخ قاعد يطلع

وبعد ما تحسين انه خلاص طلع كل ألي فيها اعصريها وحطيها بمكان فيه تهويه وجاف الين تنشف

طبعا لازم أوريكم قبل وبعد

قبل ..

 تحسون وش هالضمير الي توه يصحى هههههههههه

وبعد 

وبعد ما نشفت صار لونها افتح بس ما صورتها 

المره الجايه على الفرش ان شاء الله 

انتبهو يمكن الي مسبب لكم حبوب او مشاكل بشره هي. الفرش و الاسفنجات لانها مكان ممتاز للبكتيريا وخصوصا اذا صار فيه احد يشاركك مكياجك 

اشوفكم ب بوست جديد ان شاء الله وإذا شفتو علي خطا او شي علموني عشان أصلحه ..

What's in my bag ?

السلام عليكم :) 

من زمان أبي اقول شكرًا لصديقاتي وزميلاتي وكل الناس الي حتى ما أعرفهم وشجعوني أكمل وانزل بوستات زياده .

هالمره ودي أتكلم عن الاشياء الي لازم تصير بالشنطه 

اول شي الي عندهم شنطه كبيره احسن ترا تستفيدين اكثر من المساحة الي فيها 

هذي شنطتي الي بتكلم عنها اليوم.. 

كبيره ها ؟ هههههههههههههه

اول شي شفتوا الشي المعلق فيها على اليسار ؟ هذا وزوعوه بمعرض الظهران الدولي مرا ممتاز وشكله مميز احسن من الكتاب او الورقة حقت الأذكار 

هذا شكله من قريب 

مرا حلو تعلقينه على شنطة المدرسة عشان بالطريق تقراينه او تحطينه على شنطة السوق عشان برضو بالطريق تقراينها 

وبعدين لازم يصير فيه شنطة مكياج صغيره  ومرايا بالشنطه 

وطبعا كريم الأساس وبعض الاشياء لازم تصير كبيره ف قررت اسوي شي يختصر المساحة ويخفف علي الشنطه 

تعرفون السامبلز الي يعطونك إياهم ماك ؟ نظفيهم عدل واستخدميهم

زي كذا 

تشوفون كيف وفرت مساحه كبييييره ؟ 

وطبعا الأرواج ما ينفع تحطين واحد لان بتختلف المناسبات .. يعني كل مناسبه ولها لونها مو حلو الترقيع.

حطيت أربعه.. اثنين ماك واثنين ريڤلون 

 

وطبعا لازم يصير فيه ماسكارا 

لانكوم من البحرين- سيتي سنتر

هي حلوه ترا ونتفه مرا يعني حلوه الشنطه 

وآخر شي بشنطة المكياج هو البلشر 

حلو مرا حسافه ما صورته وهو مفتوح .. الزبده لونه فاتح شوي.

وطبعا لازم يصير فيه كريم :)

هو صدق حق بيبيات بس ريحته تعجبني ههههههههه

وطبعا لازم يصير فيه واقي شمس بس مو معقول نشيله معنا بكبره.. ف لقيت عند ماما تعرفون كريم الفنادق هذاك ؟ طيب عرفتو علبته الشفافة ؟ نظفته وعبيته 

حلو وتوفرين مساحه بعد.. وبما انك بالسعوديه ف لازم يصير معك اربع وعشرين ساعه .. انا صرت احطه بجيب مريولي. 

 وطبعا لازم يصير عطر بالشنطه 

تعجبني مرا ريحته اشتريته من دبنهامز بالظهران من منتجات بوس

لا تطالعون شكله بتكرهونه

وطبعا باقي اشياء زي : 

-مشط صغير 

-معقم 

-إذا تتغطين حطي لك نقاب إضافي عشان إذا توصخ او شي 

-منديل

ومن هالاشياء .. 

اشوفكم بالبوست الجاي :)

عن تجربه :)

أهلا وسهلا يا جميلين 

امس كنت راجعه من عزيمه وشلت المكياج حقي وسويت شي واستفدت منه مرا وقلت أفيدكم معي .. 

اول شي بوريكم اشياء وأتكلم عنها وكيف تجربتي معها : 

رقم واحد الي هو اخس شامبو استخدمته بحياتي بجميع أنواعه وأشكاله هو 

انصدمتوا صح ؟ لا صدق كلامي . اشتريت كل أنواعه وجربتهم وضروني مره 

سببو لي : 

-حكه بالرأس 

-قشره كثيفه 

-تساقط شعر 

طبعا يمكن نوعيه شعري مو نوعيه شعركم ف انا قاعده اتكلم عن نفسي يمكن يفيدكم ويمكن يضركم.

وتراه مو رقم واحد بالعالم :( 

الزبده نروح للغسولات الوجه

هذا اول واحد استخدمته 

نصح لي إياه دكتور بشره اشتريته ب ١٠٠ من صيدلية راس تنوره 

عادي يعني يفي بالغرض لكن مو هذاك الشي السحري ...

بعدين قررت أغيره 

وبديت استخدم اولاي ما ادري بكم بس احسن من الي فوق ونفع معي اكثر .. لأن الي فوق ما لبق على بشرتي وسبب لها تهيج 

طبعا هذا احسن بواجد بالنسبة لي 

الحين نروح للشي الجميل الي نصحتني استخدمه نجد الجميله :)

كلاراسيل

جيد مرا مرا لحب الشباب عن تجربه ويشيل الوصخ الي ببشرتك بعد كل يوم ادعي لنجد صدق !! 

بعدين نروح لمزيل المكياج 

يمشي الحال بس ما أحسه يشيل زين .. يعني اول ما يخلص بجرب غيره ان شاء الله 

بعدين نروح لواقي الشمس 

طبعا هذي عقدتي الي هي الشمس. وبما ان مدرستي بكبرها ساحه فمعروف انو قلبت ع ب د ه بسببها . فصرت كل ما اطلع للساحه اروح الحمام واتملط. بس المشكله ان وجهي يقلب رمادي اصير كأني شبح !! فصرت استخدمه لباقي أجزاء جسمي بس 

تذكرون الي قلت لكم اول ألبوست عنه ؟ هذا هو 

اول شي شلت باللي عاليمين بعدين أخذت قطنه وحطيت فيها شوي كلاراسيل ومسحت وجهي وشوفو وش طلع .. طبيعي ؟ 

أنصحكم بعد ما تشيلون المكياج استخدموه عشان يشيل البقايا الي بالوجه .. 

وخلص ألبوست 

وآسفه على التصوير السيء مع اني احس ان محد يشوف البوستات الي أحطهم بس يالله معليش...

والسلام عليكم 

پياتو

أهلا وسهلا ..

اعترف اني قاطعه ومن زمان ما سويت بوست بس ما فيه شي يحمس.. 

الزبده أخذت الفرصه اليوم رايحين بياتو وقلت أوريكم ايش صار وايش الأطباق الحلوه الي عندهم 

اول شي احجزوا قبل تروحون . لان المكان صدق زحمه 

اول ما وصلنا قلنا لهم أسمنا وودونا للطاوله 

بعدين طلبنا وجابو مقبلات 

خبز مع سلطة سيزر 

أعطيها ٣ من ١٠ وما تستاهل لو بتطلبونها... 

بعدين جت الاطباق الثانية 

پيتزا الپاپروني

ما فيها زود صراحه . يعني بيتزا عاديه . أعطيها ٦/١٠ 

بعدين جت حبيبة قلبي المارقريتا

هذي الطلب الي اول ما ادخل مطعم إيطالي اطلبه وانا عمياء ! 

عشره من عشره يا حبيبي !! 

بعدين جا طلب نوره الي هو مكروني الأربع أجبان رقمها ٤٠ أظن بالمنيو 

لذيذة وانصحكم تطلبونها 

أعطيها ٧من ١٠ 

طبعا الي ما جرب حقت تشيز كيك فاكتوري بيعطيها ١٠ 

بعدين جت المكرونه الي مدري شسمها... 

ما عجبتني أبد.  يعني بتاكلها عادي مو الي مرا واو ! 

أعطيها ٥من ١٠ 

بعدين جا الشريمب للاطفال مع فرنش فرايز 

ما صورت الشريمب لانه كان بعيد بس حلو للاطفال تطلبونه 

٦/١٠

طبعا الملاحظات ! 

الشي الي قهرني صدق ان كان فيه ذبان يحوم على الأكل وقلنا للمسؤول السوري أظن وعادي عنده ... يعني ما سوى شي ! نادى فلبيني وقال هي ول تايك كير . عفوا أخوي بس إحنا يعني ؟ ما فيه تعويض ؟ لو مطعم غيره كان اكرمونا. يعني صدق صدق وقاحه مرا ! وكرهت المطعم بكبره بسبب بروده ! وأطالب بتعويض يا جعلكم المنيب قايله. حومتو كبدي .

DIY أطواق الورد :)

السلام عليكم.

كثير انتشرت موضة أطواق الورد .. 

وكلنا حبيناها لكن المشكله أننا ما نلقاها ! 

وحتى لو لقيناها أسعارها جداً مبالغ فيها.. بزياده يعني.. صدق أنتوا تعبتوا عليها بس مو لهادرجه ! شدعوه والله لو انك شهر تسوينه .. 

الزبده أني عصبت لأني ما لقيت الا بكليرز وجدا شين بعد. 

قلت ليش ما أتحرك واسويه انا بنفسي ؟ مو ناقصه لا يد ولا رجل الحمدلله الله يتمم نعمته..

وقامت نجلا وراحت تركض للزامل عشان تشتري ورود وشرائط وأسلاك وأوراق شجر ومن هالكلام 

مكان الزامل ( شارع الكورنيش.بجانب البنك العربي الوطني) وحتى لو ضعتوا اسألوا اي احد عنه وما أح يقصر ان شاء الله 

الصراحة ما عندهم ورد واجد. وكلهم مغبرات ولا اكياسهم متشققة والالوان والاحجام قليله

أنتوا وكيفكم عاد.. روحوا شوفو يمكن تلقون.

هذي الاغراض

كنت بسوي اثنين بس هونت ... 

الأغراض الي تحتاجونها بسيطه وبكل بيت : 

مقص 

زراديه

ورود صناعيه

اوراق شجر 

شرائط 

واير

طوق ورد ب ١٨ ريال ! مصدقين انتم ؟ ايوه شخباركم يالتاجرات الي تبيعون الواحد ب ٣٠٠ وقصور 😪؟ 

اول شي خذي واير ولفيه على رأسك عشان تعرفين الحجم 

بعدين سكريه بالزراديه

انا استخدمت ٣ وإيرات.. أنتوا استخدموا ٦ او أكثر لانه طلع لين بزياده..

بعدين بعد ما تخلصون وتختارون كم واير وتسكرونه 

جيبوا الشريطه ولفوها عليه وإذا جيبوا تسكرونه سكروه ب صمغ حار او اربطوه

لما تجون تثبتون الورد والورق تقدرون تشيلون الوايرات الي فيهم وتلصقونهم بصمغ لكن انا لفيت الوايرات عليه احسن عشان إذا صار فيه اي خطا اقدر اشيله من الواير واعدله

وهذا لما خلصتها

طبعا لما خلصت وطلع صح اخذت الشريطه ولفيته فيها عشان تغطي على الوايرات 

 

ان شاء الله استفدتوا والي بتسوي تسوي لي تاق على الصوره بانستقرام وحفرح فيكم واللهي :(

الي قالو يبون آسفه والله آسفه بس يعني ما باليد حيله ! 

كلكم أسوي لكم يعني :)

لا تنسون الكومنتس هنا وبالانستقرام إذا تبون 

في أمان الله:)

Ramadan's gift

السلام عليكم .. 

بمناسبة شهر رمضان 

زي العاده الأب ستور الجميل دايم يفاجئنا بأشياء حلوه 

اول ما تدخلون الأب ستور بتلقون هذا 

 

أدخلوه وبتلقون كذا 

 رمضان'ز قيفت .. 

يونسون صح 😂؟ 

أسبوعيا راح ينزلون اب مدفوع ويخلونه فري لمده اسبوع بس .. 

بس حبيت أعلمكم  وشكرا :)....